ఆసియాలోని వివిధ దేశాలకు చెందిన కతోలిక డిజిటల్ మిషనరీలు, సమాచార ప్రసారకులు సెప్టెంబర్ 10 నుంచి 13 వరకు క్వెజోన్ సిటీలోని ఫెయిర్వ్యూ పార్క్లో ఉన్న Radio Veritas Asiaలో జరుగుతున్న ఆసియా కతోలిక డిజిటల్ మిషనరీల సమ్మేళనానికి హాజరవుతున్నారు.
Radio Veritas Asia ఆధ్వర్యంలో నాలుగు రోజులపాటు జరుగుతున్న ఈ సమ్మేళనంలో ఆసియాలోని వివిధ దేశాల ప్రతినిధులు పాల్గొని, కతోలిక శ్రీసభ సువార్త ప్రచారం, సమాచార ప్రసార సేవల్లో డిజిటల్ మాధ్యమాల పెరుగుతున్న పాత్రపై చర్చిస్తున్నారు.
“ప్రభావశీలుల నుంచి సాక్షులుగా: ఆసియాలో డిజిటల్ సువార్త ప్రచారానికి సినడల్ మార్గం” అనే ఇతివృత్తంతో జరుగుతున్న ఈ సమ్మేళనం, కతోలిక డిజిటల్ సమాచార ప్రసారకులు సామాజిక మాధ్యమాల్లో కేవలం ప్రభావశీలులుగా ఉండటాన్ని దాటి, డిజిటల్ వాతావరణంలో విశ్వాసానికి నిజమైన సాక్షులుగా మారాలని పిలుపునిస్తోంది.
భారతదేశంలోని మద్రాస్–మైలాపూర్ అగ్ర మేత్రాసనానికి చెందిన గురుశ్రీ రిట్చీ విన్సెంట్ కూడా ఈ సమ్మేళనంలో పాల్గొంటున్నారు. వాటికన్లో జరిగిన ఒక అంతర్జాతీయ డిజిటల్ మిషనరీల సమావేశంలో పాల్గొన్న తన అనుభవం ఈ సమ్మేళనంపై తన ఆసక్తిని మరింత పెంచిందని ఆయన తెలిపారు.
వాటికన్లో జరిగిన ఆ సమావేశంలో ఆసియా నుంచి చాలా కొద్దిమంది మాత్రమే పాల్గొన్నారని, దీంతో ఆసియా డిజిటల్ మిషనరీలు ఎక్కడ ఉన్నారనే ప్రశ్న తనలో తలెత్తిందని గురుశ్రీ రిట్చీ తెలిపారు.
“ఆ ప్రశ్న నా హృదయంలో ఒక బలమైన ఆకాంక్షగా మిగిలిపోయింది” అని ఆయన అన్నారు.
మనీలాలో జరుగుతున్న ఈ సమ్మేళనం ఆసియా డిజిటల్ మిషనరీలు ఒకరినొకరు కలుసుకుని, కలిసి పనిచేసి, పరస్పరం నేర్చుకునేందుకు ఒక మంచి అవకాశాన్ని కల్పిస్తోందని ఆయన పేర్కొన్నారు.
ప్రస్తుతం గురుశ్రీ రిట్చీ భారతదేశంలోని ఒక డిజిటల్ మిషనరీల సమాజంతో కలిసి పనిచేస్తున్నారు. ఇందులో శిక్షణ పొందుతున్న కతోలిక డిజిటల్ ప్రభావశీలులు, కతోలిక విశ్వాసంపై లోతైన అధ్యయనం చేస్తున్న డిజిటల్ మిషనరీలు ఉన్నారు.
తన భారతదేశ సేవను మరింత బలోపేతం చేసుకునేందుకు కొత్త సాంకేతిక పద్ధతులు, సాంకేతిక పరిజ్ఞానం, కొత్త ఆలోచనలను నేర్చుకోవాలని తాను ఎదురుచూస్తున్నట్లు ఆయన తెలిపారు.
ఫిలిప్పీన్స్కు చెందిన గీ రియా జడుల్కోకు ఈ సమ్మేళనం ఇతర ఆసియా దేశాల్లో సామాజిక మాధ్యమాలు, సామాజిక సమాచార ప్రసారాన్ని ఎలా ఉపయోగిస్తున్నారో తెలుసుకునే అవకాశంగా కనిపిస్తోంది.
“ఇతర సంస్కృతుల నుంచి, అలాగే ఆసియాలోని ఇతర దేశాల్లో సామాజిక మాధ్యమాలు, సామాజిక సమాచార ప్రసారాన్ని ఎలా ఉపయోగిస్తున్నారో నేర్చుకోవాలని నేను కోరుకుంటున్నాను” అని ఆమె అన్నారు.
వివిధ దేశాల నుంచి వచ్చిన ప్రతినిధులను కలుసుకోవడంతో పాటు, ఈ సమ్మేళనం ద్వారా కొత్త స్నేహాలను ఏర్పరచుకోవాలని కూడా ఆమె ఆకాంక్షించారు.
అదే సమయంలో ఫిలిప్పీన్స్కు చెందిన మికా ఎల్లా ఎల్. తబాడా సమ్మేళనంలో జరిగే చర్చల్లో పాల్గొనడంతో పాటు, ఆసియా నలుమూలల నుంచి వచ్చిన డిజిటల్ మిషనరీలను కలుసుకోవాలని ఎదురుచూస్తున్నట్లు తెలిపారు.
పాల్గొనేవారికి భిన్నమైన సంస్కృతులు, డిజిటల్ వేదికలు, ఆచరణలు ఉన్నప్పటికీ, ఒకరితో ఒకరు సహకరించుకుని, పరస్పరం నేర్చుకునేందుకు ఈ సమ్మేళనం ఒక మంచి అవకాశాన్ని కల్పిస్తోందని తబాడా అన్నారు.
“మనమందరం ఆసియన్లమే అయినప్పటికీ, మనకు భిన్నమైన సంస్కృతులు, భిన్నమైన డిజిటల్ వేదికలు, భిన్నమైన ఆచరణలు ఉన్నాయి” అని ఆమె అన్నారు.
ఫిలిప్పీన్స్ ప్రజల ఆతిథ్య స్వభావం, సృజనాత్మకత వంటి ప్రత్యేకతలను ఇతర ప్రతినిధులతో పంచుకోవాలని కూడా ఆమె పేర్కొన్నారు.
ఇండోనేషియాకు చెందిన జెన్నిఫర్ ఒడెలియా మెరెడిత్ తమ తమ దేశాల్లో డిజిటల్ సువార్త ప్రచార సేవను మరింత బలోపేతం చేసే మార్గాలపై తోటి ప్రతినిధులతో చర్చించేందుకు ఎదురుచూస్తున్నట్లు తెలిపారు.
తమ సమాజాల కోసం కొత్త రీతుల్లో మీడియా, కంటెంట్ను రూపొందించే పద్ధతులను ఈ సమావేశం ద్వారా నేర్చుకోవచ్చని ఆమె అన్నారు.
ఇండోనేషియా నుంచి ఈ సమ్మేళనానికి తాను ఏమి తీసుకువస్తున్నారని అడిగినప్పుడు, “ఒకరి కోసం మరొకరం ప్రార్థించడం” ఎంతో ముఖ్యమని మెరెడిత్ పేర్కొన్నారు.
సమ్మేళనంలో డిజిటల్ సువార్త ప్రచారం, సమాచార ప్రసార పద్ధతులు, ఆసియాలోని కతోలిక డిజిటల్ మిషనరీల మధ్య సహకారం వంటి అంశాలపై చర్చలు, శిక్షణా కార్యక్రమాలు, పరస్పర అనుభవాల పంచుకోవడం జరుగనున్నాయి.
సమ్మేళనం తొలి రోజున జరిగిన దివ్యబలిపూజతో కార్యక్రమాలు ప్రారంభమయ్యాయి. ప్రతినిధులు తమ తమ దేశాల సంప్రదాయ సాంస్కృతిక వస్త్రధారణలో పాల్గొని, ఆసియా అంతటా ఉన్న కతోలిక శ్రీసభలోని గొప్ప వైవిధ్యంతో పాటు ఐక్యతను చాటారు.
