“లూర్ద్లో విశ్వాస వెలుగులు”
ఆదివారం రాత్రి, లూర్ద్ మాత సన్నిధిలో పరిశుద్ధ లియో XIV పాపు గారు వేలాది మంది యాత్రికులతో కలిసి భక్తిశ్రద్ధలతో జపమాల ప్రార్థన చేశారు. అనంతరం, కాండిల్ వెలుగులు చేతబట్టి సాగిన కాగడాల ఊరేగింపులో విశ్వాసులతో కలిసి పాల్గొని, ఆ పవిత్ర రాత్రిని ప్రార్థనామయంగా మార్చారు.
సెప్టెంబర్ 27న పరిశుద్ధ లియో XIV పాపు గారు ఈ భక్తి కార్యక్రమంలో పాల్గొన్నారు.రాత్రి 9 గంటలకు పరిశుద్ధ లియో XIV పాపు గారు మస్సాబియెల్ గుహ నుంచి కాగడాల ఊరేగింపును ప్రారంభించారు.ఆయన వెంట పోప్ ప్రతినిధి బృందం, బిషప్లు, ఫాదర్ లు, స్వచ్ఛంద సేవకులు, కుటుంబాలు, వేలాది మంది యాత్రికులు పాల్గొన్నారు. కాగడాలు చేతబట్టి సాగిన ఈ ఊరేగింపులో మరియా మాత స్వరూపాన్ని భక్తిశ్రద్ధలతో ముందుకు తీసుకెళ్లారు. వేలాది మంది యాత్రికులు జపమాల ప్రార్థన చేస్తూ, మరియా మాతను స్తుతిస్తూ గీతాలు ఆలపించారు. భక్తి, ప్రార్థనలతో ఊరేగింపు కొనసాగింది. రాత్రి చీకటిలో వెలిగిన వేలాది కాగడాలు లూర్ద్ పుణ్యక్షేత్రాన్ని ఆధ్యాత్మిక వెలుగులతో నింపాయి.
యాత్రికులు పుణ్యక్షేత్రం చుట్టూ నడుస్తూ వివిధ భాషలలో జపమాల ప్రార్థన చేయడం లూర్ద్స్లో దీర్ఘకాలంగా వస్తున్న సంప్రదాయం. లూర్ద్స్ పర్యటనలో భాగంగా, పరిశుద్ధ లియో XIV పాపు గారు విశ్వాసులతో కలిసి ఈ సాయంత్రపు ప్రార్థనలో పాల్గొన్నారు.
1858 ఫిబ్రవరి 11 నుండి జూలై 16 మధ్య కాలంలో ఫ్రాన్స్లోని లూర్ద్ (Lourdes) నగరంలో ఉన్న మస్సాబియెల్ గుహలో 14 ఏళ్ల పేద బాలిక బెర్నాడెట్ సుబిరూస్కు పరిశుద్ధ మరియా మాత మొత్తం 18 సార్లు దర్శనమిచ్చారు.మరియా మాత బెర్నాడెట్కు తనను తాను "అమలోద్భవాన్ని" (I am the Immaculate Conception) అని పరిచయం చేసుకున్నారు.
ఈ దర్శనాల అనంతరం లూర్ద్ ప్రపంచవ్యాప్తంగా ప్రసిద్ధి చెందిన మరియా మాత పుణ్యక్షేత్రంగా మారింది. ప్రస్తుతం ఈ లూర్ద్ నగరం ప్రపంచంలోనే అత్యంత ప్రసిద్ధ కాథలిక్ పుణ్యక్షేత్రాలలో ఒకటిగా విరాజిల్లుతోంది. ప్రతి సంవత్సరం లక్షలాది మంది భక్తులు మరియా మాత ఆశీస్సుల కోసం ఈ పవిత్ర గుహను సందర్శిస్తారు.
Article and Design BY M Kranthi Swaroop
