FABC మహాసభకు ముందుగా సంభాషణకు ఆదర్శంగా నిలుస్తున్న ఇండోనేషియా కతోలిక సంఘం

2026 జూలై 20 నుండి 26 వరకు జకార్తాలో జరగనున్న ఆసియా పీఠాధిపతుల సమాఖ్య (FABC) 12వ ప్లీనరీ మహాసభకు ఏర్పాట్లు జరుగుతున్న నేపథ్యంలో, సంభాషణ, వైవిధ్యం, సేవ అనే మూడు విలువలపై నిర్మితమైన తన విశిష్ట సంఘజీవిత అనుభవాన్ని ఆసియా సంఘంతో పంచుకోవడానికి ఇండోనేషియా కతోలిక సంఘం సిద్ధంగా ఉంది.

"మీరు వీటికంటే గొప్ప కార్యాలను చూస్తారు" (యోహాను 1:50): సినొడల్ పరివర్తనకు పిలుపు మరియు ఆసియాలో వంతెనలుగా, వంతెనలను నిర్మించేవారిగా ఉండే సంఘం యొక్క ధ్యేయం అనే ప్రధాన అంశంతో జరగనున్న ఈ మహాసభలో, ఆసియా నలుమూలల నుంచి పీఠకాపరులు జకార్తాలో సమావేశమై, ప్రార్థన, విచక్షణ, ఆత్మపరిశీలన ద్వారా సంఘం సువార్త ప్రకటనా బాధ్యతను మరింత బలపరచేందుకు ఆలోచించనున్నారు.

ఇండోనేషియా కతోలిక సంఘానికి ఈ దృక్పథం కొత్తది కాదు. ప్రపంచంలోనే అత్యంత మత, సాంస్కృతిక వైవిధ్యం కలిగిన దేశాలలో ఒకటైన ఇండోనేషియాలో మైనారిటీగా జీవిస్తున్న కతోలికులు, ఎన్నో దశాబ్దాలుగా సంభాషణ, సౌభ్రాతృత్వం, పరస్పర సహకారాన్ని తమ విశ్వాస జీవితంలో భాగంగా మలుచుకున్నారు. ఈ జీవన విధానమే ఆసియా సంఘానికి ఇండోనేషియా అందిస్తున్న ప్రత్యేకమైన సాక్ష్యంగా నిలిచింది.

వైవిధ్యంలో జీవిస్తున్న సంఘం

వేలాది దీవులు, వందలాది జాతులు, అనేక స్థానిక భాషలు, విభిన్న మత సంప్రదాయాలతో ఇండోనేషియా ప్రపంచంలోనే అత్యంత వైవిధ్యభరితమైన దేశాలలో ఒకటి. దేశ జనాభాలో కతోలికులు కేవలం మూడు శాతం మాత్రమే ఉన్నప్పటికీ, వైవిధ్యాన్ని గౌరవిస్తూ, భిన్న మతాలు, సంస్కృతులకు చెందిన ప్రజలతో నిరంతర సంభాషణ సాగించడం ద్వారా సువార్తకు సాక్షులుగా నిలవడం సంఘ జీవన లక్షణంగా మారింది.

1970లో స్థాపించబడినప్పటి నుంచి సంస్కృతులు, మతాలు, ప్రజలతో, ముఖ్యంగా పేదలతో, సమాజ అంచుల్లో జీవిస్తున్న వారితో సంభాషణ ద్వారా నిజమైన ఆసియా సంఘాన్ని నిర్మించాలనే FABC దృక్పథానికి ఇండోనేషియా అనుభవం సజీవ ప్రతిబింబంగా నిలుస్తోంది.

అదేవిధంగా, 2022లో బ్యాంకాక్‌లో జరిగిన FABC-50 సాధారణ మహాసభ ఆవిష్కరించిన "ఆసియా ప్రజలుగా కలిసి ప్రయాణిద్దాం" అనే పిలుపుకు కూడా ఈ 12వ ప్లీనరీ మహాసభ కొనసాగింపుగా నిలుస్తోంది. పేదలు, యువత, వలసదారులు, ఆదివాసీ సమాజాలు, పర్యావరణ సంక్షోభాలతో గాయపడిన సృష్టి స్వరాలను ఆలకిస్తూ ముందుకు సాగాలని ఆ మహాసభ సంఘాన్ని ఆహ్వానించింది.

వంతెనలను నిర్మించే సంఘంగా మారడం

FABC పాస్టోరల్ దృక్పథంలో వంతెనలను నిర్మించడం అనేది కేవలం అంతర్మత సంభాషణను ప్రోత్సహించడమే కాదు.

సంఘ అంతర్గతంగా పరస్పరం ఆలకించడం, భాగస్వామ్యం, పారదర్శకత, జవాబుదారీతనం, దేవుని ప్రజలందరి క్రియాశీల భాగస్వామ్యం ద్వారా వంతెనలను నిర్మించాలి. అదే సమయంలో, సమాజంలో సంఘం సంభాషణకు, సయోధ్యకు, శాంతికి సాధనంగా మారాలని FABC పిలుపునిస్తోంది.

ఈ విషయంలో ఇండోనేషియా అనుభవం విశేషమైనది. ముస్లింలు, ప్రొటెస్టెంట్లు, హిందువులు, బౌద్ధులు, కన్ఫ్యూషియన్ సంప్రదాయానికి చెందినవారు, ఆదివాసీ సమాజాలతో కలిసి జీవిస్తూ, కతోలిక పాఠశాలలు, ఆరోగ్య సేవలు, విపత్తు సహాయక కార్యక్రమాలు, మానవతా సేవలు, సామాజిక పరిచర్యల ద్వారా మతభేదాలకు అతీతంగా ప్రజలకు సేవలందిస్తూ సహజీవన సంస్కృతిని పెంపొందించింది.

ఇండోనేషియా సంఘం సంస్కృతీకరణ (Inculturation) రంగంలో కూడా విశేష అనుభవాన్ని సంపాదించింది. స్థానిక భాషలు, సంగీతం, కళారూపాలు, సాంస్కృతిక సంప్రదాయాలను విశ్వసంఘ బోధనలకు నిబద్ధతను కాపాడుకుంటూనే ఆరాధనా జీవితంలో భాగం చేసింది.

అలాగే పంచశీల (Pancasila) అనే జాతీయ సిద్ధాంతం ప్రతిపాదించే మానవ గౌరవం, జాతీయ ఐక్యత, సంప్రదింపుల ప్రజాస్వామ్యం, సామాజిక న్యాయం వంటి విలువలు సౌభ్రాతృత్వాన్ని, పరస్పర సంఘీభావాన్ని మరింత బలోపేతం చేశాయి.

దేశవ్యాప్తంగా వేలాది కతోలిక పాఠశాలలు, ఆసుపత్రులు, అనాథాశ్రమాలు, వృద్ధాశ్రమాలు, సేవా సంస్థలు నిర్వహిస్తున్న సేవలు, సువార్త ప్రకటించడం అనేది కేవలం మాటల ద్వారా మాత్రమే కాకుండా, మానవ గౌరవాన్ని పరిరక్షించే కరుణామయ సేవ ద్వారా కూడా జరుగుతుందని ప్రపంచానికి చాటిచెబుతున్నాయి.

అవకాశాలు – సవాళ్లు

వేగంగా అభివృద్ధి చెందుతున్న డిజిటల్ ప్రపంచం, యువ జనాభా అధికంగా ఉండటం ఇండోనేషియా సంఘానికి కొత్త అవకాశాలను తెరచి పెట్టాయి. యువ కతోలికులు నూతన ఆవిష్కరణలు, సమర్థవంతమైన సమాచార ప్రసారం, సువార్త ప్రకటనా సేవల ద్వారా సినొడల్ సంఘ నిర్మాణంలో కీలక భాగస్వాములుగా ఎదగాలని సంఘం ఆశిస్తోంది.

ప్రపంచంలో అత్యంత సమృద్ధిగా జీవ వైవిధ్యం కలిగిన దేశాల్లో ఇండోనేషియా ఒకటి. అయితే వాతావరణ మార్పుల ప్రభావానికి కూడా అత్యంత సున్నితంగా ఉండడం వల్ల, సృష్టి సంరక్షణ సంఘ ధ్యేయంలో అంతర్భాగమైంది. మన ఉమ్మడి గృహమైన భూమిని కాపాడటం, పర్యావరణ విధ్వంసం వల్ల ఎక్కువగా నష్టపోతున్న ప్రజలతో సంఘీభావంగా నిలవడం సంఘ సేవలో ముఖ్యమైన అంశాలుగా మారాయి.

అదే సమయంలో, లౌకికవాదం, వ్యక్తివాదం, కృత్రిమ మేధస్సు, తప్పుడు సమాచారం, సామాజిక విభజనలు, సమాచార వినిమయ పద్ధతుల మార్పులు వంటి పాస్టోరల్ సవాళ్లను కూడా సంఘం ఎదుర్కొంటోంది.

సినొడల్ పరివర్తన అంటే లౌకిక విశ్వాసుల భాగస్వామ్యాన్ని పెంపొందించడం, యువతకు నాయకత్వ అవకాశాలు కల్పించడం, మహిళలకు నిర్ణయాత్మక బాధ్యతల్లో మరింత స్థానం ఇవ్వడం, పారదర్శక పరిపాలనను బలోపేతం చేయడం, మరింత భాగస్వామ్య సంఘ నిర్మాణాన్ని అభివృద్ధి చేయడం కూడా అని సంఘం గుర్తిస్తోంది.

అదేవిధంగా పేదరికం, వలసలు, మానవ అక్రమ రవాణా, ఆర్థిక అసమానతలు, పర్యావరణ సంక్షోభం వంటి సమస్యలను పరిష్కరించేందుకు సంఘం, ప్రభుత్వాలు, పౌర సమాజం, వివిధ మతాల ప్రజలు మరింత సన్నిహితంగా కలిసి పనిచేయాల్సిన అవసరం ఉందని ఇండోనేషియా సంఘం భావిస్తోంది.

కలిసి నడిచే సంఘం

FABC 12వ ప్లీనరీ మహాసభకు ఆతిథ్యం ఇవ్వడం ద్వారా ఇండోనేషియా కతోలిక సంఘం తన అనుభవాన్ని ఆసియాలోని స్థానిక సంఘాలతో పంచుకునే అపూర్వ అవకాశాన్ని పొందుతోంది. ఇది కేవలం ఒక పాస్టోరల్ నమూనాను పరిచయం చేయడం మాత్రమే కాదు; వైవిధ్య మధ్య సంభాషణ, సేవ, సంఘీభావం, సౌభ్రాతృత్వం ద్వారా వికసించిన సంఘ జీవితం ఎలా ఉంటుందో ప్రత్యక్ష సాక్ష్యంగా చూపించే అవకాశం.

"మీరు వీటికంటే గొప్ప కార్యాలను చూస్తారు" (యోహాను 1:50) అనే క్రీస్తు వాగ్దానానికి విశ్వాసంగా, ఆసియా సంఘాలు సినొడల్ పరివర్తన మార్గంలో కలిసి నడుస్తూ, మానవులను దేవునితో మళ్లీ కలిపే వంతెనలుగా, ప్రజల మధ్య సయోధ్యను నెలకొల్పే సాధనాలుగా, సృష్టి సంరక్షణ పట్ల నూతన నిబద్ధతను ప్రేరేపించే విశ్వాస సమాజాలుగా మారాలని ఈ మహాసభ పిలుపునిస్తోంది.

ఇండోనేషియా నుంచి ఆసియా సంఘానికి వినిపిస్తున్న సందేశం ఒక్కటే—విశ్వాసం, నిరీక్షణ, ప్రేమలతో కలిసి నడిచే సంఘం, వేగంగా మారుతున్న ప్రపంచంలో శాంతికి, న్యాయానికి, ఐక్యతకు మరింత విశ్వసనీయమైన సాక్షిగా నిలవగలదు.