జకార్తా: ఈ జూలైలో ఇండోనేషియాలోని జకార్తాలో జరగనున్న ఫెడరేషన్ ఆఫ్ ఏషియన్ బిషప్స్ కాన్ఫరెన్సెస్ (FABC) ప్లీనరీ అసెంబ్లీ కోసం ఆసియా శ్రీసభ సిద్ధమవుతున్న వేళ, FABCకి చెందిన ప్రధాన పాస్టోరల్ కార్యాలయాలలో ఒకటైన విద్య మరియు విశ్వాస నిర్మాణ కార్యాలయం (Office of Education and Faith Formation – OEFF) ఆసియా వ్యాప్తంగా విశ్వాస నిర్మాణాన్ని బలోపేతం చేయడం, విశ్వాస బోధనను నవీకరించడం, కాథలిక్ విద్యా పరిచర్యకు చేయూతనివ్వడం ద్వారా శ్రీసభ మిషన్ను మరింత బలపరుస్తోంది.
గతంలో విద్య మరియు విద్యార్థుల ఆధ్యాత్మిక పరిచర్య కార్యాలయం (Office of Education and Student Chaplaincy – OESC)గా పిలువబడిన ఈ కార్యాలయం, ప్రస్తుతం విద్య మరియు విశ్వాస నిర్మాణ కార్యాలయం (OEFF)గా కొనసాగుతోంది. ఆసియాలోని వివిధ బిషపుల సమాఖ్యల పరిధిలో విశ్వాస బోధన నాయకత్వాన్ని బలోపేతం చేయడం, సమగ్ర విశ్వాస నిర్మాణాన్ని ప్రోత్సహించడం, కాథలిక్ విద్యా పరిచర్యలకు మద్దతు అందించడం దీని ప్రధాన లక్ష్యం.
ఆసియా దేశాల విద్యా, విశ్వాస బోధన కమిషన్లతో సన్నిహిత సహకారాన్ని పెంపొందిస్తూ, శ్రీసభ విద్యా, విశ్వాస బోధనకు సంబంధించిన ప్రాధాన్య అంశాలను ముందుకు తీసుకెళ్లడం ఈ కార్యాలయం లక్ష్యంగా పెట్టుకుంది. అంతేకాకుండా, ఆసియా వ్యాప్తంగా విద్యా, విశ్వాస బోధన రంగాల్లో సేవలందిస్తున్న నాయకులకు ఒక సమన్వయ వేదికగా నిలవడం, స్థానిక శ్రీసభల మధ్య బంధాలను బలోపేతం చేయడం, పాస్టోరల్ అనుభవాలను పరస్పరం పంచుకునే అవకాశాలను కల్పించడం, అలాగే FABC తీర్మానాలు మరియు సినోడల్ లక్ష్యాల అమలుకు తోడ్పడడం కూడా ఈ కార్యాలయం ముఖ్య బాధ్యతల్లో భాగం.
స్థాపించబడినప్పటి నుండి ఈ కార్యాలయం విద్య, విశ్వాస బోధన అంశాలపై అనేక సమావేశాలు, సదస్సులను నిర్వహించింది. ముఖ్యంగా, ఆసియాలో శ్రీసభ విశ్వాస బోధన సేవకు దిశానిర్దేశం చేసిన మూడు చారిత్రక సమావేశాలు, వాటి ద్వారా వెలువడిన పత్రాలు విశేష ప్రాధాన్యం సంతరించుకున్నాయి.
వాటిలో మొదటిది "ఏ రిన్యూడ్ కటెకెసిస్ ఫర్ ఆసియా: టువార్డ్స్ ది ఇయర్ 2000 అండ్ బియాండ్" అనే పత్రం. 1995లో సింగపూర్లో జరిగిన పాన్-ఏషియన్ కాన్ఫరెన్స్ ఆన్ కటెకెసిస్ అనంతరం ఇది వెలువడింది. అప్పటి OESC, సింగపూర్ పాస్టోరల్ ఇన్స్టిట్యూట్ సహకారంతో నిర్వహించిన ఈ సమావేశం, ఆసియా ఖండానికి అనువైన నవీకృత విశ్వాస బోధన దృక్పథానికి పునాది వేసింది.
దశాబ్దానికి పైగా అనంతరం, 2006లో థాయ్లాండ్ రాజధాని బ్యాంకాక్లో "ఫ్యామిలీ కటెకెసిస్: ఆసియా వాస్తవాల నుంచి ఎదురవుతున్న సవాళ్లు" అనే అంశంపై సంప్రదింపుల సమావేశాన్ని కార్యాలయం నిర్వహించింది. 2004లో దక్షిణ కొరియాలో జరిగిన ఎనిమిదవ FABC ప్లీనరీ అసెంబ్లీ "ఆసియాలో కుటుంబం" అనే అంశంపై చేసిన ఆలోచనలకు కొనసాగింపుగా నిర్వహించిన ఈ సమావేశం, మారుతున్న ఆసియా పరిస్థితుల్లో కుటుంబాలు విశ్వాసాన్ని తదుపరి తరాలకు అందించే ప్రధాన వేదికలుగా ఎలా మారాలనే అంశాన్ని లోతుగా పరిశీలించింది.
2022లో ప్రస్తుత పేరుతో విద్య మరియు విశ్వాస నిర్మాణ కార్యాలయం (OEFF) "ఆంటిక్వుం మినిస్టేరియుం (Antiquum Ministerium)" అంశంపై సంప్రదింపుల సమావేశాన్ని నిర్వహించింది. జూన్ 8 నుండి 10 వరకు ఆన్లైన్లో జరిగిన ఈ సమావేశంలో ఆసియాలోని వివిధ పీఠాధిపతుల సమాఖ్యలు, విశ్వాస బోధన కమిషన్లకు చెందిన 106 మంది ప్రతినిధులు పాల్గొన్నారు. సాధారణ విశ్వాసులకు "ఉపదేశి" (Catechist) పరిచర్యను అధికారికంగా అప్పగించాలన్న పరిశుద్ధ పోప్ ఫ్రాన్సిస్ గారి పిలుపును ఈ సమావేశం పరిశీలించింది. అనంతరం సమావేశం తుది ప్రకటనతో పాటు కార్యవివరాలను ప్రచురించింది.
ఈ చారిత్రక పత్రాలతో పాటు FABC విడుదల చేసిన ఇతర పత్రాలను ఆధారంగా చేసుకొని, ఆసియాలో విశ్వాస బోధనకు మార్గదర్శకంగా నిలవాల్సిన ఎనిమిది ప్రధాన ప్రాధాన్యాంశాలను OEFF గుర్తించింది. వాటి ప్రకారం, విశ్వాస బోధన ఆసియా సమాజాల వాస్తవ పరిస్థితుల్లో పాతుకుపోయి ఉండాలి; సంభాషణకు ప్రాధాన్యం ఇవ్వాలి; ఆసియా యేసు ముఖచిత్రాన్ని ప్రజలకు పరిచయం చేస్తూ ఆయన జీవిత సందేశాన్ని ప్రకటించాలి; కుటుంబాలకు ప్రత్యేక ప్రాధాన్యం కల్పించాలి; యువతకు సమకాలీనంగా, అర్థవంతంగా ఉండాలి; మహిళల పాత్ర, వారి సేవలను గుర్తించి ప్రోత్సహించాలి; నేటి సామాజిక, సాంస్కృతిక, సాంకేతిక పరిణామాలకు స్పందించాలి; అలాగే మన ఉమ్మడి గృహమైన సృష్టి సంరక్షణను ప్రోత్సహించాలి.
ఈ ప్రాధాన్యాంశాలు, ఇటీవలి కాలంలో FABC విడుదల చేసిన అత్యంత ప్రాముఖ్యమైన పత్రాలలో ఒకటైన "బ్యాంకాక్ పత్రం" (2023)లో పేర్కొన్న తొమ్మిది పాస్టోరల్ ప్రాధాన్యాలతో ఎంతో సన్నిహిత సంబంధాన్ని కలిగి ఉన్నాయి.
విద్య మరియు విశ్వాస నిర్మాణ కార్యాలయం (OEFF)కు ఇండోనేషియాలోని బండుంగ్ మేత్రాసన పీఠకాపరి పీఠకాపరి ఆంటోనియస్ సుబియాంటో బుంజామిన్, OSC అధ్యక్షత వహిస్తున్నారు. ఆయనకు మలేషియాలోని కౌలాలంపూర్ మహాపీఠకాపరి మహాపీఠకాపరి జూలియన్ లియో బెంగ్ కిమ్, హాంకాంగ్ సహాయ పీఠకాపరి పీఠకాపరి జోసెఫ్ హా చి-షింగ్, OFM, ఫిలిప్పీన్స్లోని కొటబాటో మహాపీఠకాపరి మహాపీఠకాపరి చార్లీ ఎం. ఇంజోన్, OMI, దక్షిణ కొరియాలోని ఇంచోన్ పీఠకాపరి పీఠకాపరి జాన్ బాప్టిస్ట్ జంగ్ షిన్-చుల్ సహకరిస్తున్నారు. ఈ కార్యాలయ కార్యనిర్వాహక కార్యదర్శిగా మలేషియాకు చెందిన డా. స్టీవెన్ సెల్వరాజు సేవలందిస్తున్నారు.
జకార్తాలో జరగనున్న FABC ప్లీనరీ అసెంబ్లీ కోసం ప్రతినిధులు సమావేశమవుతున్న ఈ తరుణంలో, సమగ్ర విశ్వాస నిర్మాణం, విశ్వాస బోధన పునరుద్ధరణ, విద్యా రంగంలో పరస్పర సహకారానికి OEFF కొనసాగిస్తున్న నిబద్ధత, ఆసియా శ్రీసభ భవిష్యత్తు కేవలం సువార్తను ప్రకటించడంలోనే కాకుండా, ఆసియా ఖండంలోని విభిన్న సామాజిక వాస్తవాల్లో ఆ విశ్వాసాన్ని జీవించి, సాక్ష్యంగా చాటగల శిష్యులను తీర్చిదిద్దడంలోనూ ఉందనే విషయాన్ని మరోసారి గుర్తుచేస్తోంది.
