ఆసియాలోని శ్రీసభ పంచుకోవడం గురించి మాట్లాడటానికే పరిమితం కాకుండా, శ్రీసభ ఉమ్మడి సువార్త ప్రచార సేవ కోసం తన వనరులు, ప్రతిభ, సమయం, ఆర్థిక సహాయాన్ని పంచుకోవడానికి మరింత సంసిద్ధత చూపాలని ఇండోనేషియా కతోలిక పీఠాధిపతుల సమాఖ్య (KWI) అధ్యక్షుడు పీఠాధిపతి ఆంటోనియస్ సుబియాంటో బుంజామిన్, OSC పిలుపునిచ్చారు.
జూలై 26న జకార్తా బృహద్దేవాలయ సముదాయంలోని కార్య పాస్టోరల్ భవనంలో జరిగిన Federation of Asian Bishops' Conferences (FABC) 12వ ప్లీనరీ సమావేశం ముగింపు విలేకరుల సమావేశంలో మాట్లాడుతూ, సినడాలిటీ అనేది కలిసి నడవడం, ఒకరికొకరు తోడ్పడడం పట్ల మరింత లోతైన నిబద్ధతను కోరుకుంటుందని పీఠాధిపతి ఆంటోనియస్ అన్నారు.
"ఆధ్యాత్మిక విషయాలను పంచుకోవడం గురించి మనం సులభంగా మాట్లాడతాం. కానీ మన వనరులు, మన ప్రతిభ, మనల్ని మనం, అంతేకాదు మన ఆర్థిక వనరులను పంచుకోవడం విషయమేమిటి?" అని ఆయన ప్రశ్నించారు.
వారం రోజులపాటు కొనసాగిన ప్లీనరీ సమావేశం ముగిసిన అనంతరం నిర్వహించిన ఈ విలేకరుల సమావేశంలో, ఆసియా కోసం సినడాలిటీ ఆచరణాత్మక మార్గదర్శకం రూపకల్పనకు సంబంధించిన చట్రం సిద్ధం చేయడం, అలాగే ప్లీనరీ సమావేశం తుది సందేశం విడుదల వంటి ఫలితాలపై శ్రీసభ నాయకులు తమ అభిప్రాయాలను పంచుకున్నారు.
అయితే పీఠాధిపతి ఆంటోనియస్ దృష్టిలో, ఈ ప్లీనరీ సమావేశం అందించిన అత్యంత విలువైన ఫలితం రూపొందించిన పత్రాలు కాదు; ఆసియాలోని శ్రీసభల మధ్య పెంపొందిన సౌభ్రాతృత్వం, పరస్పర పంచుకునే అనుభవమే.
"ఈ ప్లీనరీ సమావేశంలో మనం చర్చించిన పత్రాలు కాదు అత్యంత ముఖ్యమైనవి. మన జీవితాలను పరస్పరం పంచుకోవడమే అత్యంత విలువైనది," అని ఆయన అన్నారు.
ఆసియా నలుమూలల నుంచి వచ్చిన పీఠాధిపతులు, గురువులు, కన్యస్త్రీలు, సామాన్య విశ్వాసుల ప్రతినిధులు తమ సేవాపర అనుభవాలు, సవాళ్లు, నిరీక్షణలను పరస్పరం పంచుకోవడం ద్వారా మొత్తం శ్రీసభను సమృద్ధిగా తీర్చిదిద్దారని ఆయన వివరించారు.
1990లో బాండుంగ్లో జరిగిన ఐదవ ప్లీనరీ సమావేశం అనంతరం, 36 సంవత్సరాల తర్వాత ఇండోనేషియా రెండోసారి FABC ప్లీనరీ సమావేశానికి ఆతిథ్యం ఇచ్చింది. ఆసియా నలుమూలల నుంచి వచ్చిన ప్రతినిధులను ఆహ్వానించే అవకాశం లభించడం దేవుని ఆశీర్వాదమని, అది శ్రీసభ ఆతిథ్య స్ఫూర్తికి ప్రతీకగా నిలిచిందని పీఠాధిపతి ఆంటోనియస్ పేర్కొన్నారు.
"మాకు పెద్దగా ఎలాంటి ఇబ్బందులు ఎదురుకాలేదు. దానికి విరుద్ధంగా, మేము ఎంతో ఆనందంగా ఉన్నాం. వచ్చిన ప్రతి ప్రతినిధిని ఆత్మీయంగా స్వాగతించి, మా ఆతిథ్యాన్ని అందించాం," అని ఆయన చెప్పారు.
ఇండోనేషియా చూపిన ఈ ఆతిథ్యం, సంభాషణ, స్నేహబంధం, విశాల హృదయంతో సంబంధాలను నిర్మించడమే సినడాలిటీ అనే భావనకు ప్రతిబింబమని ఆయన అన్నారు.
ఈ స్ఫూర్తికి అత్యంత స్పష్టమైన వ్యక్తీకరణగా ప్రతినిధులు జకార్తా బృహద్దేవాలయాన్ని, ఆగ్నేయాసియాలోని అతిపెద్ద మసీదైన ఇస్తిక్లాల్ మసీదును అనుసంధానించే ఫ్రెండ్షిప్ టన్నెల్ను సందర్శించడాన్ని ఆయన ప్రస్తావించారు.
ఈ సందర్శన కేవలం ఒక సాంస్కృతిక అనుభవం మాత్రమే కాదని, ఆసియాలో వారధులు, వారధుల నిర్మాణకర్తలుగా మారాలి అనే ప్లీనరీ సమావేశ ప్రధాన ఇతివృత్తానికి ఫ్రెండ్షిప్ టన్నెల్ శక్తివంతమైన ప్రతీకగా నిలిచిందని పీఠాధిపతి ఆంటోనియస్ చెప్పారు.
ఫ్రెండ్షిప్ టన్నెల్ గుండా కలిసి నడవడం ద్వారా, సంభాషణ అనేది సమావేశాల్లో చర్చించే ఒక భావన మాత్రమే కాదని, విశ్వాసం, పరస్పర గౌరవం, నిజమైన మానవ సంబంధాల ద్వారా నిర్మించబడే జీవన వాస్తవికత అని స్పష్టమైందని ఆయన అన్నారు.
వివిధ మతాల ప్రజల మధ్య స్నేహబంధం, సహకారాన్ని పెంపొందించేందుకు కృషి చేస్తున్నందున ఇస్తిక్లాల్ మసీదు ప్రధాన ఇమామ్ను "మానవ వారధి"గా ఆయన అభివర్ణించారు.
ప్రధాన ఇమామ్ సందేశాన్ని ప్రస్తావిస్తూ, నిజమైన మత విశ్వాసం మనిషిని దేవునికి మాత్రమే కాకుండా తన తోటి మానవులకు కూడా మరింత చేరువ చేయాలని పీఠాధిపతి ఆంటోనియస్ అన్నారు.
"ఒక వ్యక్తి దేవునికి ఎంత దగ్గరవుతాడో, అంతగా తన తోటి మానవులకు కూడా దగ్గరవుతాడని నేను విశ్వసిస్తున్నాను," అని ఆయన పేర్కొన్నారు. ప్లీనరీ సమావేశంలో కార్డినల్ లూయిస్ ఆంటోనియో టాగ్లే పంచుకున్న, క్రీస్తే దేవునికి, మానవాళికి మధ్య వారధి అనే ధ్యానాన్ని కూడా ఆయన ఈ సందర్భంగా గుర్తుచేశారు.
ప్రతినిధులకు ఇండోనేషియా సంప్రదాయ బాటిక్ వస్త్రాలను బహుమతిగా అందించడం వంటి చిన్న చిన్న ఆతిథ్య సూచనలు కూడా స్నేహబంధం, పరస్పర పంచుకునే స్ఫూర్తిని ప్రతిబింబించాయని ఆయన అన్నారు. అయితే, సినడాలిటీ చివరికి ఆచరణాత్మక కార్యరూపం దాల్చాల్సిందేనని ఆయన నొక్కి చెప్పారు.
పీఠాధిపతి ఆంటోనియస్ అభిప్రాయం ప్రకారం, ఆసియా శ్రీసభ ముందున్న సవాలు ఏమిటంటే, ప్రతి స్థానిక శ్రీసభకు ఉన్న వనరులను అందరికీ అప్పగించబడిన సువార్త ప్రచార సేవ కోసం పరస్పరం పంచుకుంటూ, సంఘబంధ స్ఫూర్తిని ఆచరణాత్మక సంఘీభావంగా మలచడమే.
